إعلان علوي

الوصفة الاصلية للدوناتس مش هتحسي بفرق بينها وبين الي بتشتريها



يقدملك مطبخ منه الوصفة الاصليه للدوناتس من داخل محلات 

الحلويات  ومش هحتاجي تشتريها تاني خالص الوصفة بالمقادير 

المظبوطة واحلي طعم .


المقادير : 

* بيضة 

* معلقتين سمنه او زبده 

* نصف كوب مياه 

* معلقة خميره 

* رشه ملح 

* معلقة لبن بودر 

* معلقة سكر 

* كوب ونصف دقيق 



الطريقة : 

اولا نجيب بوله ونحط الدقيق وعليها الملح ، و علي النار هنحط الميه 

والزبدة والخميره و السكر واللبن البودر . هنسخنهم بس مش لدرجة 

الغليان طبعا ، وبعدين نقفل النار ونحط البيضه ونضربها مع الخليط 

بالمضرب كويس ، نضيف الخليط الدافي دا علي الدقيق ، ونعجن

لحد ما العجينه تتماسك  مع بعضها ،، 

في ملحوظة حابة اقولها مقدار الدقيق والمياه بيختلف طبعا لان كل

نوع دقيق بياخد مياه غير مختلفة يعني حاولي تستخدمي دقيق 

فاخر وخاص للمعجنات وتتعاملي مع الميه ومع الدقيق بالتدريج . 

بعد  كدا نعجن العجينه كويس اووي  لحد ماتبقي ملساء وطرية 

وبتلزق  علي خفيف .. 

هنسيب العجينه ترتاح حوالي نصف ساعه الاول  وبعدين نفردها 

كويس بسمك متوسط  ١ سم  مثلا  علشان لسه هتتضاعف وبعدين 

نقطع الدوناتس بقطاعات الدوناتس ودي بتتباع ف المحلات عادي .. 

وبعدين ترصي الدوناتس ف صنيه بيها ورق زبده وعليها دقيق و

تسيبي الدوناتس تخمر تاني حوالي نصف ساعه او  ساعه الا ربع 

حسب الجو لو ساقع مثلا ،

وبعدين نحمر الدوناتس ع نار متوسطة وتاخد اللون الذهبي الجميل 

وطلعيها علي ورق نشاف علشان تتخلص  من كل الزيت ، 

نيجي للتزين علشان تعملي تزيين زي بتاع برا في خليط اسمه  جلاز

glaze  ودا عباره عن نصف كوب سكر بودر وعليه معلقه زبدة وشويه

 مياه ، وتقلبيهم مع بعض لحد ما يختلطلو والسكر يذوب تماما 

وحاولي الخليط دا يبقي كريمي الي حد ما مش سايل وبعدين هننزل 

فيه الدوناتس واحدة واحدة ممكن تضيفي للجلاز دا شيكولاته او 

الوان طعام يعني تشكليه زي ماانتي عايزه وطبعا ترشي سكر  بودر 

علي الدوناتس وهي دافيه شويه وممكن تغمسيها بشيكولاته سايحة .. 

التشكيل دا يرجعلك وزي ماتحبي

والف هنا  

ليست هناك تعليقات